लोहेगाव-वाघोली मार्गावरील कंपनीला भीषण आग; जीवितहानी नाही

पीएमआरडीएच्या अग्निशमन दलाने सात फायर इंजिनच्या मदतीने आग आटोक्यात आणली. कंपनीच्या आवारात मोठ्या प्रमाणात तेल, ग्रीस व इतर ज्वलनशील साहित्य साठले होते, त्यामुळे आगीची तीव्रता वाढून शेजारील फर्निचर मॉलचे नुकसान झाले. आग मॉलमधील फर्निचर आणि दोन गॅस सिलिंडरमध्ये पसरली, त्यामुळे परिसरातील धोका वाढला. आगीची माहिती मिळताच आमची टीम तात्काळ घटनास्थळी दाखल झाली. तेल आणि ज्वलनशील पदार्थांमुळे आग वेगाने पसरत होती; तथापि, वेळीच हस्तक्षेप केल्याने शेजारील वस्त्या वाचल्या आणि मोठे नुकसान टळले,” असे पीएमआरडीएचे मुख्य अग्निशमन अधिकारी देवेंद्र पोटफोडे यांनी सांगितले. सुरुवातीला वाघोली अग्निशमन केंद्राच्या दोन इंजिन काही मिनिटांतच घटनास्थळी पोहोचल्या. आगीची तीव्रता लक्षात घेऊन पुणे महापालिकेच्या (पीएमसी) पाच अतिरिक्त इंजिनांनाही मदतीसाठी पाचारण करण्यात आले. आग विझवण्यासाठी अग्निशमन दलाच्या जवानांनी त्यावर पाणी आणि फोम फवारला. बुधवारी रात्री उशिरापर्यंत अग्निशमन विभागाला आगीचे नेमके कारण समजू शकले नव्हते. या घटनेत मोठे आर्थिक नुकसान झाले असून पोलीस आणि अग्निशमन विभागाकडून घटनेचा तपास सुरू आहे.